कलेज फरायनायखौ गारनानै देरहासाद जानाय भारतनि माखासे एन्ट्रप्रिन्यरफोर

जिउआव जौगानो, समाजाव एबा हादराव माबा मोनसे गोगोम गोहोम खोख्लैनो गोजौ सोलोंथायनि चार्टिफिकेइटखौ नांथारगौ नामा? गोबांनि थाखाय जिउआव देरहानाया चार्टिफिकेइट आरो मार्कसनि सायावनो सोनारो। नाथाय गाहायाव होनाय लाइमोनफोरा थिखानानै दोन्नाय लामा – सोलोंथाय जोबनानै चार्टिफिकेइट लानानै साख्रि नागिरनाय – बै लामानिफ्राय दिंग्रायनानै गावसोरनि फरायनायखौ गारनानै एन्ट्रप्रिन्यरशिपनि रिमोन्दला लामाखौसो सायखनानै जिउआव देरहासाद जानो हादों आरो समाज एबा हादरनि थाखाय मुंखजाथाव बिहोमा होलांनो हादों।

रितेश अगरवाल

बिथांनि मुंखौ गोबाङानो खोनाफेराखै जानो हागौ, नाथाय बिथांजों गायसनजानाय कम्पानि OYO Rooms एबा OYO Hotel खौ मोनथियै रावबो गैला। 1993 माइथायाव जोनोम मोन्नाय रितेश अगरवालनि बैसोया Nov 2020 सफैब्लासो 27 बोसोर जागोन, नाथाय बिथांनि धोननि बेसेना दिनैसिम गासै 7,500 कौटि रां (Hurun Rich List – 2020 नि बायदियै)। 19 बोसोर बैसोआव बांसिन मेलेम गोनां लाइमोनफोरनि सिमांआ बबेबा IIT, IIM, MIT, Harvard, Oxford एबा Standford फोरनिफ्राय डिग्रि लानायनि सिमांजोंनो आबुं जानाय। नाथाय 10+2 खौ पास जाखांनानै 19 बोसोर बैसोनि लाइमोन रितेश अगरवाल बिथांहा बेफोरनि थाखाय समआनो गैया। जाय बैसोआव बांसिन लाइमोनफोरा डिग्रिनि आनजादफोराव मोजां अनजिमा लानो थाखाय हांखुर, बे बैसोआवनो, थामहिनबा 2012 माइथायाव रितेश बिथांआ Oravel Stays खौ गायसनो (जायनि मुंखौ बोसोरसेनि उनाव सोलायनानै OYO Rooms दोन्नाय जायो)। 8 बोसोरनि उनाव बिथांआ दिनै 7,500 कौटि रांनि बिगोमा, OYO Roomsनि valuation आ 73,000 कौटि, जिस्नि रोजा सुबुंफोरनो साख्रि होयो, बिथांनि बिज्नेसआ एसिया, इउरप, सा खोला आमेरिकाफोराव साग्लोबसारनाय, बुहुमनि गिदिर गिदिर investor फोरा बिनि कम्पानिआव रां लागायना दं। बैसो 13 आव मबाइल सिम फानग्रा, नक्सालफोरनि जायगा फिसा ट्राइबेल जायगा बिषाम (उरिषा)नि middle class मारवारि नखाराव जोनोम मोन्नाय, 10+2 ल पास जानाय सासे बेबायदि लाइमोननि बेबायदि उथ्रिसार जानो हानाय थारैनो गोमोथाव नङाना?

ट्रिशनीट आर’रा

दाइन थाखोआव खेबसे फेल जादों, गु थाखोखौ बारख्लनांदों, गोजौ फरायसालिखौ Distance Education नि हेफाजाबै पास जादों। नोंथांमोना मा सानगोन बे गथनि इयुननि फारसे? फिननायखौ होनो नोंथांमोना गोसोखांदों जानो हागौ बर’नि बाथ्रा भाव – “मुला देरगोनखौ बिलाइ गांनैयावनो सिनायखायो”। नोंथांआ गोरोन्थि। 26 बोसोरनि ट्रिशनीट बिथांआ दिनै बुहुमाव सिनायजानाय cyber security expert (ethical hacker), सासे लिरगिरि आरो TAC Security कम्पानिनि गायसनगिरि आरो बिथांनि धोननि बेसेना खमावबो 861 कौटि रां।  बोसोर 2020 आव ‘Entrepreneur’ मेगाजिनजों ‘Entrepreneur of the Year, बोसोर 2019 आव ‘Fortune India’ नि ’40 under 40’ आव बयनिख्रुयबो गोहोम खोख्लैनो हाग्रा लाइमोनफोरनि मादाव सासे हिसाबै सायखजादों, बोसोर 2018 आव आमेरिकानि ‘Forbes’ मेगाजिनजों ’30 under 30’ फारिलायाव सोसनजादों । CBI, पानजाब, गुजराट सरकारफोर, रिलाइन्स इन्डास्त्रिज, आमुल बायदि बायदिफोरा दिनै ट्रिशनीट आर’रानि clients।

कुनाल शाह

freecharge खौ नोंथांमोना खोनाबाय जानांगौ। बे कम्पानिआ गासैबो रोखोमनि online payment खालामो जेरै मबाइलनि बिल होनाय एबा रिचार्ज, मोब्लिबनि बिल होनाय, DTH TV रिचार्ज, मेट्र रिचार्ज, आरो गुबुन गुबुन रोखोमनि financial instruments जेरै savings, insurance, investment बायदि बायदि नि services होयो। बिसोरनि app खौ बाहायनानै नोंथांआ जिदु जेखुनु माबा मोनसे फिनेनसियेल ट्रेनजेकशन खालामोब्ला नोंथांआ discount नङाब्ला cashback offer मोनो। माबोरै बिदि होनो हायो बेनो freecharge नि बिज्नेसनि मोन्थोर। 2015 माइथायाव Snapdeal आ freecharge खौ 2,520 कौटि रांनि बायनानै लायो – भारतनि e-commerce sector नि नैथि देरसिन takeover।  बिनि उनाव 2017 माइथायाव Axis बेंकआ 256 कौटि रांनि बायनानै लायो। बेबादि एसेबां बेसेन गोसा कम्पानिनि गायसनगिरि कुनाल शाह बिथांआ नाथाय Philosophy आवसो BA खालामदों आरो MBA फरायनायखौ लामा ससेआवनो गारदों। 37 बोसोर बैसोनि कुनाल शाह बिथांनि धोननि बेसेना 2015 माइथायाव गासै 8,190 कौटि।

पल्लव नधानि

पल्लव नधानि आरो बिथांजों गायसनजानाय data visualization (charting) libraries फानग्रा कम्पानि FusionCharts खौ सरासन्स्रा सुबुंफोरा बारा मिथिबाङा। नाथाय गिदिर गिदिर हाइ-टेक कम्पानिफोर जेरै Apple, Google, Cisco, Facebook, Intel, Microsoft, Hewlett-Packard, IBM, NASA नि Weather Channel, आमेरिका जुथाय हादरनि सरकारमोन बायदिया FusionCharts नि बायगिरिफोर। बेनि अनगायैबो FusionCharts हा 23 रोजा कास्टुमार, 5 लाख बाहायग्राफोर (users) 120 हादरफोराव गोसारना दं। 16-17 बोसोर बैसोआव FusionCharts खौ गायसननाय पल्लव बिथांआ बै समाव जि थाखोल मोनहैदोंमोन। कम्पानि गायसनखांनानैलाय आरो बबेआवथो फरायनायनि सम जाबावनो! केलकाटा मुलुगसोलोंसालियाव फरायबावनो होन्नानै मुं थिसन्दोंब्लाबो कम्पानि सामलायनांगौ जानायलाय फरायनायखौ गारनांनायसै। कम्पानिआ जेब्ला मोजाङैनो सोलियो अब्लासो एडिनबार्ग मुलुगसोलोंसालिआव कम्प्युटार साइन्स फरायनो थाङो। थाखो जिआव फरायफुनाय गथआ बबेनिफ्राय बिदि idea मोनखो? पल्ल्वनि बादिब्ला, गाव जेब्ला गावनि हाइ स्कुलनि बबेबा आनजादनि थाखाय प्रजेक्ट बानायब्ला Microsoft नि excel sheet आव थानाय चार्ट बानायनायनि माखासे features खौ साबद्रायनाय मोनाखै, shortcoming फोरखौ नुनानै बेनिफ्राय साबसिन सफ्टवेर बानायनि थांखि लानानै FusionCharts खौ गायसनो। 28 बोसोर बैसोआव (2014) बिथांनि बेंक अकाउन्टआव 29 कौटि निबो बारा दंमोन आरो गासै 49 कौटि बेसेननि बिज्नेसनि बिगोमामोन।

अझाहार इकुबल, डिपित पुर्कयास्था, अनुनइ अरुनव

FOMO (Fear of Missing Out) जों साबफाजानाय आरो गासैखौबो इसेल समनि गेजेरावनो मावफुंनो नागिरनाय दानि जुगनि लाइमोनफोरहा माबा मोनसे खौरां मोनथिनो खौरां बिलाइफोरनि गोलाव-गोलाव खौरां फोसावनायफोरखौ फरायनो सम गैबाङा। जाउनाव दानि लाइमोनफोरखौ खौरां बिलाइ फरायनायखौ नुबाङा। नाथाय खौरां बिलाइ फरायाब्लाबो जाया – सान्नाय हनायफोरा एबा गियानफोरा गुवार जाया। थिक बे जेंनाखौनो सुफुंनो अझाहार इकुबल, डिपित पुर्कयास्था आरो अनुनइ अरुनवमोना गावसोरनि IIT (दिल्ली) फरायनायखौ गारनानै Inshorts (आवगायाव News in Short) खौ गायसनो। मोनसे खौरांनि नांगौखिनि बाथ्राफोरखौ द’जि सोदोबजों फोजोबनानै दानि लाइमोन आरो खौरां फोसावगिरिफोरनि गेजेराव थानाय जेनेरैशन गेपखौ फोजोबस्राङो। 2019 हालागै Inshorts नि बोसोरारि खामायनाया 71 कौटिमोन। अक्टबर, 2020 सिमआव Inshorts नि खालि एनड्रइड भारजननि एपआनो से कौटिनिबो बारा डाउनलड खालामजाबाय।

राहुल यादव

1989 माइथायाव जोनोम मोन्नाय राहुल यादवआ 2007 माइथायाव IIT (बम्बे) आव फरायफुनाय समावनो गोजाम सोंथि बिलाइफोरखौ अनलाइन दोन्थुमनो exambaba.com वेबसाइट गायसनो। फरायसालिमाया जेब्ला वेबसाइटखौ बोखारनो थिनो अब्लानो फरायनायखौ ज्राब गारो। बा बोसोरनि उनाव (2012), जेब्ला बिसोरो मुम्बाइआव न नागिरनानै मोन्नो थाङाखै अब्ला बे जेंनाखौ सुस्रांनो गावनि माखासे लोगोफोरखौ लानानै housing.com खौ गायसनो। बे बोसोरावनो housing.com खौ hottest tech startup फोरनि मादाव मोनसे होन्नानै गनायजायो आरो जापानआव थानाय बुहुमनि मुंदांखा रां लागायग्रा (investor) softbank मोन बायदिया housing.com आव रां लागायो एबा invest खालामो । बिथांनि entrepreneurial skill खौ गनायथि होनानै Forbes मेगाजिनआ गावसोरनि ’30 under 30’ (बोसोर 30 निख्रुय उन्दैसिन बयनिफ्रायबो गोजोंसिन लाइमोनफोर) फारिलाइआव बिथांनि मुंखौ थिसनो । 26 बोसोर बैसोआव एफाबां धोन लानानै मा खालामनो होन्नानै बिथांआ फ्राय 200 कौटि रांखौ गावनि कम्पानिआव साख्रि मावग्राफोरनो रान्दलानानै होयो।