चिनआ माबोरै बिरोंदामिन बाहायना क’र’ना भाइरासखौ फेजेनखो

क’र’ना भाइरासखौ गिबि 8 दिसेम्बरआव हमजेन्नो मोनो चिननि हुबेइ हालामनि उहान नोगोराव। नाथाय चिनआ 14 जानुवारिसिम भाइरास बेरेखा हाबाफारिखौ गुबैयै जागायजेनाखैमोन। गिबि-गिबियाव चिनआ भाइरासखौ फेजेन्नायनि दावहायाव गोरोनथिबो खालामबोदों। थेवब्लाबो दानसे-दान्नैनि गेजेराव चिनआ क’र’नानि साग्लोबसारनायखौ गावसोरनि हादराउ फ्राय गैयाखौनो खालामबाय होनबला बारा बुंनाय जानाय नङा। सोनाबारि हादरफोरनि माखासे गोरों-गोराफोरा चिन खुंथायनि रायजो-राजाफोरनि थांलाय-फैलायखौ गोख्रोंयै दब्थायनाय, गाव-गावनि न’आव थाहोनो गोख्रों आइन जाबसिन्ना होनाय (lockdown), privacy rightखौ खेरखेरायालासे नोगोरारिफोरनि सायाव गोख्रों नोजोर होनायफोरखौ साबजानाय मोनाखैब्लाबो, World Health Organization (WHO) Director General Dr Tedros Adhanom Ghebreyesusआ चिननि गिख्रंथाव सन्देरग्रा भाइरासखौ फेजेन्नायनि आदब-खायदाखौ बाख्नायदों। आंनि लिरनायनि जाहोना चिननि दिक्तेतरियाल स्ताइलजों क’र’ना दब्थायनाया साबजादों ना साबजायाखै बेखौ सावरायनो थाखाय नङा नाथाय जौगा थाखोनि बिरोंदामिनखौ (advanced technology) माबोरै क’र’ना दब्थायनो बाहायखो आरो बेसेबां देरहासार जाखो बेखौसो।

गोख्रों आइनजों लोगोसे चिनआ गावसोरनि जौगा थाखोनि गोख्रों बिरोंदामिनारि गोहोनि सायाव गोगोमैनो सोनारनानै क’र’ना भाइरासखौ फेजेन्नायनि खामानि मावलांदों। बैफोर बिरोंदामिनफोरनि मादाव गाहायै Artificial Intelligence (AI), Data Science, संदानग्रा बिरोंदामिन (tracking technology) – महर सिनायारि बिरोंदामिन (facial recognition technology), drones, संदानग्रा केमेरा (surveillance camera) -, infrared thermometers, र’ब’टफोर (robots), जान-फाहामथाय (telemedicine), बानायफ्रामखानाय-न-बानायग्रा मुवाफोर (pre-fabricated building materials), digital payment, online shopping, बायदिफोरानो मुंख’जाथाव। बेफोरखौ सुबुं माहारिनि गुबुन गुबुन जेंना सुस्रांनायनि थाखाय दिहुन्नाय जादोंब्लाबो बेफोर बिरोंदामिनखौ क’र’ना फेजेन्नायनि दावहायाव माबोरै बाहायखो नायदिनि।

फोसावजानाय खौरां, social media platform फोरनिफ्राय मोन्नाय data बायदिखौ AI नि advanced algorithm नि हेफाजाबै बिजिरनानै क’र’ना गोसारनाय जायगा, बिनि फैगौ लामा, बबे बबे जायगायाव साग्लोबहैनो हागौ, बेसेबां गिख्रं’थाव जानो हागौ बेफोरखौ खुंथायनो खिन्थाग्रोनानै होदों आरो बे हिसाबै होबथानायनि राहा लामा लानायाव एबा साग्रित जानायाव हेफाजाब होदों।

चिननि संदान्नाय बेबस्थाया (surveillance system) गुबुन हादरफोरजों सोंखारि जायोब्लाबो बियो बिसोरनि क’र’नानि दावहायाव गोबां हेफाजाब होदों। क’र’ना साबफाजानाय सुबुंफोर जायफोरा खुंथायनि बिथोनखौ फालियालासे खुलायै गिदिंबाय थादों, सुबुं थुबुर जाग्रा जायगाफोराव गिदिंबायहैदों, बैफोर सुबुंखौ जेरावबो थानाय surveillance camera फोरजों सं दानदों, बिसोरनि मह’रफोरखौ facial recognition technology नि हेफाजाबै सिनायनानै, हमनानै जुदा (quarantine) खालामदों आरो क’र’ना गोसारनायखौ दबथायनो हादों। surveillance cameraफोरखौ infrared thermometer फोरजों दाजाबनानै होंगो-दोंगो जायगाफोराव गाइस’न्ना लोमजानाय सुबुंफोरखौ सिनायनो हादों आरो बारा गोसारनायनि सिगां दब्थायनो हादों। Drone फोरखौ खुंथायनि नआवथा (lockdown) बिथोनखौ फालिदों ना फालियाखै नायगिदिंनो बाहायदों, सम रैखा खालामनो मुलि, जाग्रा आदार बायदिसिना रोगाहोदों।

Digital payment नि हेफाजाबै सोर-सोर क’र’ना थाथावगौ सिनायदों (क’र’नानि लैखोन फाहामनो मुलि बायोब्ला जेरै गगा, लोमजानाय, गुजुनाय) आरो बिनि उनाव बै सुबुंफोरजों थोंजोंयै रायज्लायनानै हालसालखौ थि खालामदों – बारा गोब्राब नङै लोमजानायफोरखौ जान-फाहामथायजों (tele-medicine) फाहामथायारि बोसोनफोर होनानै देहा फाहामसालियाव थांनांनायखौ खम खालामदों।

Robot फोरनि हेफाजाबै माखासे जाइगाफोरखौ बेंदों, जिउसा फोजोबस्रांनो मुलि सारदों (disinfection)। उहानावनो थानाय Hongshan Sports Centre नि फोथाराव robot आरो IoT (Internet of Things) जों सामलायजानाय देहा फाहामसालि बानायदों। बेमारिफोरखौ 5G connected thermometer जों आनजाद खालामनाय जादों आरो Covid19 नि लैखोनफोर मोनोब्ला देहा फाहामग्राफोरखौ सांग्रां खालामदों। बेमारिफोरखौ आसान एबा आसथाम गानहोनानै गोजानाव थानाइ CloudMind नि AI नि हेफाजाबै, बिखा सौनाय, थैआव थानाय अक्सिजेननि बिबां आरो देहानि बिदुंफोरखौ नोजोर होनाय जादों।

मबाइल technology खौ बाहायनानै गोबां क’र’ना गैयै सुबुंफोरखौ क’र’नाजों साबफाजानायनिफ्राय रैखा खालामदों। QR (quick response) code खौ बाहायनानै चिननि खुंथाय आरो आलिबाबा, तेनसेन्त बायदि कम्पानिजों बानायजानाय smartphone app, जायखौ ‘close contact detector’ होन्नानैबो मोनथियो, बे app नि हेफाजाबै क’र’ना गैयै सुबुंआ गावनि खाथिजों सोरबाफोर क’र’ना गोनां एबा थाथाव सुबुंआ थांदों नामा बेफोरखौ खिन्थानानै होदों जाहाते सुबुंफ्रा सांग्रां जानो हायो। साफ्रोमबो चिनआव थाग्राफोरा shopping mall, मावख’ बायदिफोराव हाबनायनि सिगां color-coded health rating system नि QR codeखौ स्केन खालामथारनांगौ। देहा एबा दावबायनायनि जारिमिनखौ नोजोर होनानै साफ्रोमबो सुबुंनो गोजा, गोमो आरो गोथां गाबनि code होनानै होदों आरो सोर खुलायै गिदिंबायनो हागोन सोर हाया बे गाबनि codeखौ नायनानै खुंथाय बिफानफोरा थि खालामो।

गुबुन बेरामफोरनिफ्रायबो गिख्रंथावसिन क’र’नानि मोनसे आखुथायानो जाबाय जिगाब गोरान बायदि हमथास्लाब हायै खामद्लाबनाय एबा गोसारनाय जायनि जाउनाव क’र’नाजों गाग्लोबजानाय सुबुंफोरा देहा फाहामसालियाव लोमसावफैनानै देहा फाहामसालिनि जा सुजुग-सुबिधाफोर दं बेफोरखौ थोयै-मोलोमै खालामनाय। क’र’नाखौ फेजेन्नो गोबां देहा फाहामसालि, जौ-जौ बिसना, हां लाहोग्रा आगजु (ventilators) नि गोनांथि जायो नङाब्ला गोबां बेरामिफोरा फाहामथाय मोनालासिनो थैनांगौ जायो। बिनि थाखायनो चिनआ 10-15 साननि गेजेरावनो गोबां जौ-जौ बिसना गोनां देहा फाहामसालि लुफुंदों बानायफ्रामखानाय-न-बानायग्रा मुवाफोर (pre-fabricated building materials) नि हेफाजाबै।

जौगा थाखोनि बिरोंदामिन बाहायनानै सुबुं माहारिखौ Covid19 बायदि गिलु-बालु सनदेरग्रा बेरामनिफ्राय रैखा खालामनो हानाया चिननि थाखाय बाख्नायथाव जादों। थाखानाय एबा गोदान बिरोंदामिनारिफोरा माबोरै सुबुंनि जेंना सुस्रांनायाव बाहायजायो बेनि थाखाय बियो मोनसे गिदिर बिदिन्थि। क’र’ना दब्थायनाय माखासे हाबाफारिनि देरहासात जानाया गोगोमै सोनारदों चिननि बुहुमनि बयनिख्रुयबो जौगासिन आरो जेरावबो साग्लोबसारनाय संदान्नाय हाबाफारि (most expansive and sophisticated surveillance system), जाय नोगोरारिनि privacy rights खौ बारा खेरखेराया। सुबुं खुंथाय हादरफोराव, जेराव खुंथायनि आखायाव privacy right खौ मानियालासै खामानि मावनायनि बारा गोहो गैया, बैफोर हादरफोराव जिदु क’र’नानि गाग्लोबनाया गिख्रं’थाव महर लायोब्ला चिननि बायदि गावनि नोगोरारिफोरनि सायाव privacy right खौ नेवसिनानै गोख्रों नोजोर होनांगोन नामा क’र’नाखौ दबथायनो? मोनसे गिदिर सोंथि।