दासानदि, बुहुमाव ChatGPTनि बारहुंखा बारदों। इन्टारनेटनि जारिमिनाव , TikTok एबा Instagramखौ लाफानानै, गुबुन जेबो एपआ खम समावनो बेबायदि अनसायजाफेराखै। गावनि गोमोथाव खामानि मावनो हानाय आरो इयुनाव साबसिन खालामसिननो हाहैनायनि गोहोजों बियो फालांगि, बिरोंदामिन, लिरगिरि, प्रफेसनालफोरनि बुहुमफोरखौ सोमावग्लुंजोबबाय। 2022 मायथाइनि नभेम्बर दानाव दिहुननायनि हाफथासे उनावनो ChatGPTखौ बाहायग्रानि अनजिमाया 10 लाखनिबो बारा जाहैदों। बेजों लोगोसे सोमजिहोबाय गोदान मुगानि बादायलायनाय – आर्टिफिसियेल इन्टेलिजेन्सनि फोथारखौ सोर गावनि आखाय मुथायाव लानो हायो।
ChatGPT (Chat Generative Pre-Trained Transformer) आ मोनसे आर्टिफिसियेल इन्टेलिजेन्सजों गोहो होजानाय रायज्लाय र’ब’ट (chatbot) जायखौ OpenAI मुंनि आमेरिकानि सेनफ्रेनसिसक’आव थानाय मोनसे कम्पानिआ दिहुनदों। ChatGPT आ, मोनसे सानजुनथिनि प्रग्रामब्लाबो बियो मानसिबायदि रायज्लायनो (एबा दासिमाव लिरनो) हायो आरो गोबां रोखोमनि गियाननि सायाव गुआरै आरो मोजांयैनो फिननाय होनो हायो। जांख्रिथायारि बे रायज्लायब’ट आ गोबां रोखोमनि खामानिफोरखौ गोरोनथि गैयालासै जोबोर मोजांयैनो मावनो हायो। नोंथांनिफ्राय प्र’मप्ट (promptएबा बिथोन) मोनब्लानो बियो सोंथिफोरनि मोजां फिननाय होनो हायो, लिरबिदां लिरनो एबा लिरबिदांफोर लिरनायाव हेफाजाब होनो हायो, खन्थाय लिरनो हायो, इ-मेइल, सानजुनथिनि कड, आयेननि बागै, देहा फाहामथाइ, संनाय-खावनायनि रेसिपि आरो गोबां बायदि बायदि आयदानि सायाव गुवारै लिरनो हायो। गुसुंयै, बेखौ मोनसे आयदानि सायाव जोबोर गोरों सासे सुबंजों रुजुनो हायो – फारागआ बेनोलदि, सासे सुबुंआ मोनसे एबा मोननैसोल आयदायाव थारैनो जोबोर गोरों जानो हायो, नाथाय ChatGPTआ साननि गाहायाव थानाय गासैबो आयदानिनो आखा-फाखा।
ChatGPTखौ बबेआव मोनगोन?
https://chat.openai.com सिम थां
अकाउन्ट गैयाब्ला रेजिसटार खालाम
गुदि बिलाइनि (Home Page) आगसिनि गोजौसिन खनायाव थानाय “New Chat”आव क्लिक खालाम
माबा मोनसे सोंथि एबा बिथोन (prompt) टाइप खालामनानै एन्टार खालाम अब्लानो नोंथांआ ChatGPTखौ बाहायनो हागोन।
बिनि अनगायैबो, ChatGPTखौ माइक्र’स’फ्ट एदज ब्राउजारनि (Microsoft Edge Browser) हेफाजाबैबो बाहायनो हागोन। माइक्र’स’फ्ट एदज ब्राउजारनि आगदा गोजौआव थानाय बिं (Bing) ल’ग’आव क्लिक खालामबानो जागोन। जिदु नोंथांआ माइक्र’स’फ्ट अकाउन्टआव लगिन खालामाखै नांगौखिनिखौ खालामनानै लगिन खालामबानो जागोन। नोंथांआ मोनथाम अपशन मोनगोन – Creative, Balanced आरो Precise – नांगौ रोखोमनि फिननाय मोननो थाखाय नांगौ अपशनखौ सायखब्लानो जाबाय।
ChatGPTआ सुबुंफोरनि साख्रि फोजोबगोन नामा?
फोजोबस्रांगोन, ChatGPT एबा बेखौ गोहो होनाय बिरोंदामिनफोरा माखासे साख्रिफोरखौ फोजोबस्रांगोन। पेनसिलभेनिया मुलुगसोलोंसालि, अपेन रिसार्स (Open Research) आरो अपेन एआइ (OpenAI) नि नाइबिजिरनायाव मिथिनाय बादिब्ला माखासे साख्रिफोरा ChatGPTखौ गोहो होनाय बिरोंदामिनफोरजों फोजोबस्रांजानायनि बांसिन खैफोदआव दं। सेम अल्टमेन, OpenAIनि CEO, जाय कम्पानिआ ChatGPTखौ दिहुनदों, बिथांआबो गावनि कम्पानिनि दिहुन्थाया साख्रिनि हाथायनि सायाव माबादि खैफोद लाबोगोन बेखौ लाना इसे जिंगा सिनाय फोरमायदों। अट’मैशन खालामजानायनि बारासिन खैफोदआव थानाय माखासे साख्रिफोरानो जादों लिरगिरि, सानखान्थिगिरि, ब्ल’कचेइन इनजिनियार, डिजिटेल इन्टारफेइस डिजाइनार, बेंगिरिफोरनि हेफाजाबगिरि (administrative assistants), गोरोन्थि सोदांग्राफोर (proof readers) बायदि बायदि। नाइबिजिरनायाव मिथिनाय बादिब्ला बांसिन खैफोदआव थानाय साख्रिफोरानो जादों गोबां रां खामायग्रा ब्लु क’लार (blue collar) साख्रिफोर एबा जाय साख्रिनि थाखाय फरायसालियारि सोलोंथायनि (formal education) गोनां जायो। नाथाय, जाय साख्रि एबा हाबाखौ मावनो थाखाय गुबुनजों थाफानानै सोलोंनांगौ जायो (apprenticeship) जेरै आबादारि, गारि बानायग्रा, दंफां मिस्त्रि, संग्रा-खावग्रा, दैनि मिस्त्रि, गाब फोनगिरि (painter), केफेटेरिया सिबिग्रा, बायदि बायदि साख्रिफोरा फोजोबस्रांजानायनि बारा खैफोदआव गैया।